Efnafræðifélag Íslands » Ráðstefnur

Vel heppnuð ráðstefna

Soffia — Tue, 24 Nov 2009 10:12:21 +0000

Fimmta ráðstefna Efnís var haldin 14. nóvember á Hótel Loftleiðum. Ráðstefnan var afar vel sótt og góður rómur var gerður að fyrirlestrum og veggspjöldum. Tæplega sjötíu manns sóttu ráðstefnuna og rúmlega sextíu snæddu hátíðarkvöldverð sem einnig var árshátíð félagsins.

Fjallað var um ráðstefnuna á vefnum student.is. Hér er tengill á fréttina.

Veitt voru verðlaun fyrir besta veggspjaldið og að féllu þau í skaut Manuelu Magnúsdóttur meistaranema í lífefnafræði við HÍ.

Um kvöldið var ýmislegt gert til skemmtunar. Ingvar Árnason flutti skemmtilegt erindi og Sigurður Smárason sýndi efnafræðitöfrabrögð með sprengjugenginu sínu.

Ráðstefnunefndin og stjórn Efnís þakka þátttakendum kærlega fyrir einkar ánægjulegan dag!

5. ráðstefna Efnís – framlengdur skráningarfrestur

Soffia — Mon, 02 Nov 2009 16:57:48 +0000

5. ráðstefna Efnís verður haldin 14. nóvember á Hótel Loftleiðum.

Við getum enn tekið við skráningum og ágripum. Fresturinn fyrir ágripin hefur verið framlengdur til 6. nóvember en hægt er að skrá sig á ráðstefnuna/árshátíðina fram í næstu viku.

Tilkynnið þátttöku á efnis09@gmail.com.

Breyting hefur orðið á dagskránni, Tom Brenner afboðaði sig vegna Japansferðar en í staðinn mun Eric hjá kerfislíffræði HÍ halda tölu, titill erindisins er ekki kominn á hreint.

Eins er vert að benda á að hádegisverður er innifalinn í ráðstefnugjaldinu.

Kvöldverðurinn eftir ráðstefnuna er líka árshátíð Efnís. Hægt er að mæta eingöngu á árshátíðina og makar eru að sjálfsögðu velkomnir!

Siggi Smára verður að vanda með efnafræðitrikk (vonandi fer brunakerfið ekki í gang eins og í Iðnó fyrir tveimur árum) og Ingvar Árnason mun rifja upp tilurð Efnís fyrir tíu árum. Við rifjum upp ráðstefnulagið frá síðustu ráðstefnu – og kannski er spurning um nýjan ráðstefnutexta?!

Matseðill kvöldsins:

Forréttur: Rjómalöguð blómkálssúpa með brauðkruðum.

Aðalréttur: Steikarhlaðborð; lambalæri, nautafilé og kalkúnabringa ásamt tveimur tegundum af sósum, salötum, grænmeti, kartöflum og öðru tilheyrandi.

Eftirréttur: Volg súkkulaðikaka með jarðarberjum og vanilluís

Upprunalega auglýsingin er hér.

Sjáumst sem flest á þessari áhugaverðu ráðstefnu! Eflum félagsandann, styrkjum efnafræðiræturnar og fræðumst um nýjustu rannsóknirnar.

Ráðstefna Efnís í nóvember – efnafræði og nýsköpun

Soffia — Mon, 05 Oct 2009 15:35:55 +0000

5. ráðstefna Efnafræðifélags Íslands verður haldin 14. nóvember á Hótel Loftleiðum. Efna- og lífefnafræðingar eru hvattir til þess að nýta þetta tækifæri til að kynna rannsóknir sínar og nemenda sinna með veggspjöldum. Þema ráðstefnunar verður Efnafræði og nýsköpun.

Skráningarfrestur á ráðstefnuna er til 1. nóvember á netfangið efnis09@gmail.com. Ágrip erinda og veggspjalda skal senda á sama netfang.

Ráðstefnunni verður skipt upp í þrjár lotur, Líf- og Heilsutækni; Efnafræði og efnatækni; og Græn efnafræði (sjá dagskrá hér að neðan).

Ágrip skulu vera á bæði íslensku og ensku og rúmast á einni A4 síðu.

Standarnir sem halda munu upp veggspjöldunum setja ákveðnar skorður. Best er ef spjöldin verði í stærsta lagi í A0 og auðvitað standandi (hæðin mesta lagi 120 cm og breiddin í mesta lagi 90 cm).

Að lokinni ráðstefnunni, verður haldinn árshátíð Efnafræðifélags Íslands 2009 sem var frestað vegna óvissunar í þjóðfélaginu síðasta vetur.

Verð:

	Meðlimur Efnís	Ekki meðlimur	BS nemar*
Ráðstefna + kvöldverður	10.800	14.900	8.000
Ráðstefna án kvöldverðar	6.400	8.000	2.500
Kvöldverður eingöngu	4.900	6.300	4.900

* Gegn því að BS nemar gerist aukaaðilar að félaginu.

Dagskrá:

10:10 – 12:00 Líf- og heilsutækni.

Sesselja Sigurborg Ómarsdóttir, Háskóli Íslands: Bioprospecting: Efnaauðlegð í lífríki hafsins.

Gissur Örlygsson, NMI – Tækni: Kítínafleiður og kalsíumfosföt til beingræðslu.

Tom Brenner, Iceproteins: Einangrun, notkun og eiginleikar þorskvöðva próteina.

Örfyrirlestrar úr völdum ágripum veggspjalda 1 & 2.

13:00 – 15:00 Efnafræði og efnatækni.

Sunna Ólafsdóttir Wallevik, Steyputækni: Nýsköpun í steyputækni á Íslandi.
Páll Theodórsson, Háskóli Íslands: Upphaf landnáms lesið með kolefnis-14 aldursgreiningum.

Ragnar Jóhannsson, Arctic Tilapia: Efnafræði vatnsendurnýtingar í eldi hlývatnsfiska á Íslandi.

Örfyrirlestrar úr völdum ágripum veggspjalda 3-5.

15:00 – 16:00 Kaffihlé og veggspjaldakynningar.

16:00 Græn efnafræði.

Oddur Ingólfsson, Bíódísel hf: Bíódísel á Íslandi.

Sigurbjörn Einarsson, Bláa lónið: Fóðrun smáþörunga með CO₂ jarðhitagasi.

Edda Sif Aradóttir, Háskóli Íslands: Föngun og förgun kolefnis – staðbundnar lausnir á hnattrænum vanda.

17:00 – 19:00 Hlé.

19:00 – 01:00 Árshátíð Efnafræðifélags Íslands. Veislustjóri, Soffía Sveinsdóttir.

Hér má nálgast auglýsinguna.

Fimmta ráðstefna Efnís 14. nóvember

Soffia — Mon, 21 Sep 2009 13:24:24 +0000

Fimmta ráðstefna Efnís verður haldin þann 14. nóvember á Hótel Loftleiðum. Þema ráðstefnunnar er “efnafræði og nýsköpun”. Fyrirlestrum er skipt niður á þrjár lotur sem allar tengjast nýsköpun: a) lífefnafræði, b) efnafræði, c) græn efnafræði.

Einnig gefst háskólanemendum, prófessorum og fyrirtækjum að kynna rannsóknir sínar, vörur, nýjungar eða annað tengt efnafræði með veggspjöldum. Veggspjöldin mega fjalla um hvað sem er sem tengist efnafræði. Lokaskiladagur ágripa á ensku og íslensku er 1. nóvember. Ágrip skal senda á efnis09@gmail.com. Fimm aðstandendum veggspjalda verður boðið að halda örfyrirlestra til að kynna veggspjöldin.

Vel heppnuð ráðstefna um sameindakennsl

Soffia — Wed, 16 Sep 2009 13:37:08 +0000

Ráðstefnan „Affinity 2009″ sem Alþjóðafélag um sameindakennsl (e. International Society for Molecular Recognition, ISMR) stendur fyrir annað hvert ár, var haldin dagana 12. til 16. júlí á Háskólatorgi.

Þar var Dr. Ruedi Aebersold, prófessor í Zürich, veitt Pierce Affinity Award sem kostuð eru af fyrirtækinu Pierce sem nú er hluti Thermo Scientific samsteypunnar. Var Dr. Aebersold sérstaklega boðið til Íslands til að taka við verðlaununum. Var hann valinn af sérstakri valnefnd undir forsæti Meir Wilchek prófessors við Weizmann Institute of Science í Ísrael, eins af upphafsmönnum griptækninnar (affinity chromatography) og avidin-biotin kerfisins sem víða er notað í líftækni. Dr. Aebersold hélt síðar fyrirlestur á ráðstefnunni og var titillinn: “Systems Biology: Network of Interacting Molecules”.

Í lok ráðstefnunnar voru veitt verðlaun, Roche Younger Investigator Awards, til ungra vísindamanna sem kynntu rannsóknir sínar með fyrirlestrum eða veggspjöldum. Verðlaunin eru kostuð af fyrirtækinu Hoffmann-La Roche Ltd. Fyrstu verðlaun fyrir veggspjöld hlutu sameiginlega, þeir Haraldur Garðarsson og Sandip Shelke, báðir nemendur Snorra Þórs Sigurðssonar prófessors í lífrænni efnafræði við raunvísindadeild Háskóla Íslands. Titill verkefnis Sandips var “Nucleic acid receptor-ligand interactions studied by EPR spectroscopy”. Titill verkefnis Haraldar var “Single nucleotide mismatch detection using fluoroside çf”. Meðal annarra sem hlutu viðurkenningu var Óttar Rolfsson doktorsnemi við Háskólann í Leeds á Englandi. Titill erindis hans var: “The MS2 genome is a dynamic scaffold for MS2 capsid assembly”.

Dagskrá ráðstefnunnar, útdrætti erinda og veggspjalda ásamt ljósmyndum má sjá á vefsíðu ráðstefnunnar http://www.affinity2009.hi.is/

Hér eru tvær myndir frá verðlaunaafhendingum:

Ruedi Aebersold , handhafi Pierce Award for Affinity; Hörður Filippusson, forseti ráðstefnunnar; Meir Wilchek; Gideon Fleminger, forseti ISMR

Roche Younger Investigator Award verðlaunahafar ásamt matsnefndinni.

Fréttir frá stjórninni

Efnís — Thu, 01 Jan 1970 00:00:00 +0000

Myndir frá ráðstefnunni eru hér. Undirrituð gafst upp á að setja myndirnar inn á síðuna….

Stjórnin ætlar líklega að skipta um vefkerfi þar sem núverandi kerfi, Mambo, er frekar þungt í vöfum og óþarflega flókið (sbr myndirnar).

Komnar eru dagsetningar á viðburði á næsta ári. Vinsamlegast takið eftirfarandi daga frá:

7. febrúar (fimmtudagur): Aðalfundur Efnís

7. mars (föstudagur): Árshátíð Efnís

Vel heppnuð ráðstefna

Efnís — Thu, 01 Jan 1970 00:00:00 +0000

Fjórða ráðstefna Efnís var haldin á Hótel Loftleiðum í gær. Flutt voru níu áhugaverð erindi sem öll voru tengd efnafræði og orkufrekum iðnaði á einn eða annan hátt. Framhaldsnemar og leiðbeinendur þeirra kynntu rannsóknir sínar og alls voru 14 veggspjöld til sýnis.

Þátttaka var vonum framar en alls voru gestir rúmlega fimmtíu sem er aðeins meira en á tveimur síðustu ráðstefnum félagsins.

Að loknum erindum var boðið til þriggja rétta kvöldverðar. Þar áttu ráðstefnugestir ánægjulega kvöldstund og var kátt á hjalla. Oddur Ingólfsson var veislustjóri og stýrði meðal annars bráðskemmtilegum leik þar sem veislugestir suðu saman nýjan texta við piparkökusönginn úr Dýrunum í Hálsaskógi (“þegar piparkökur bakast….”). Stjórnarborðið samdi fyrstu þrjár línurnar og síðan bætti hvert og eitt borð við textann.

Hér að neðan má sjá þennan snilldartexta sem hefur fengið hið frumlega heiti Ráðstefnulagið 2007:

Þegar títra skal til baka

er það fyrsta sem menn taka

nokkur millimól af sýru

og tvo drop’ af methyl red.

Síðan á að setj’ í þetta

ekki dugar sígaretta

heldur gin og tónik sletta

þá er títrunin í höfn.

Til að endurbæta leikinn þarf að

skrifa langa skýrslu

og svo gefa IUPAC nöfn.

Eftir þetta síðan skal…

skreppa svo á barinn góða

fá sér nokkra stóra bjóra

og svo skella sér á skeljarnar

og vona að einkunnin sé í höfn.

Ráðstefna: Uppfærð dagskrá og framlengdur skráningarfrestur!

Efnís — Thu, 01 Jan 1970 00:00:00 +0000

Skráningarfrestur á ráðstefnuna sjálfa hefur verið framlengdur til 14. nóvember!

Svana tekur sem fyrr við skráningum á netfangið svana(hjá)hi.is

Dagskráin hefur verið uppfærð og hér er nýjasta útgáfan:

Dagskrá:

9:30 Mæting, ráðstefnugögn afhent

10:00 Setning ráðstefnunar, Sigurður V. Smárason formaður Efnís

10:10 Jarðvarmi, umsjón: Már Másson

Útrás í nýtingu jarðvarma – Lárus Elíasson (Enex)

Hreinsun útblásturs frá jarðvarmavirkjunum – Teitur Gunnarsson (VGK-Hönnun)

Jarðefnafræði og jarðhitarannsóknir – Þráinn Friðriksson (ISOR)

12:00 Hádegismatur á Hótel Loftleiðum

13:00 Stóriðja, umsjón: Soffía Sveinsdóttir

Álframleiðsla-rafgreining – Gunnar Ari Guðmundsson/Fannar Jónsson (Alcan)

Járnblendifélagið fetar inná nýjar brautir – Þorsteinn Hannesson(Íslenska

Járnblendifélagið)

Kísilframleiðsla, raunhæfur kostur á Íslandi – Guðmundur Gunnarsson (Íslenska

nýsköpunarmiðstöðin)

15:00 Kaffihlé og veggspjaldakynningar

16:00 Umhverfismál og nýjungar, umsjón: Guðbjörg H. Óskarsdóttir

Efnavöktun í umhverfi iðjuvera – Þór Tómasson (Umhverfisstofnun)

Aflþynnur, hvað er það? – Magnús Þór Ásgeirsson (Atvinnuþróunarfélag Eyjafjarðar)

Koldíoxíð sem eldsneyti – Oddur Ingólfsson Carbon Recycling International (CRI)

Spörun jarðefnaeldsneytis, raunhæfar lausnir – Sigþór Pétursson (Háskólinn á Akureyri)

18:30 Fordrykkur og veggspjaldakynningar framhald

19:30 Kvöldverður, þriggja rétta máltíð, veislustjóri: Oddur Ingólfsson

Ráðstefna 17. nóvember – skráning hafin!

Efnís — Thu, 01 Jan 1970 00:00:00 +0000

Efnafræði og orkufrekur iðnaður

Fjórða ráðstefna Efnafræðifélags Íslands

Dagsetning: 17. nóvember 2007

Staðsetning: Hótel Loftleiðir, Reykjavík

Dagskrá:

9:30 Mæting, ráðstefnugögn afhent

10:00 Setning ráðstefnunar, Sigurður V. Smárason formaður Efnís

10:10 Lota 1: Jarðvarmi, umsjón: Már Másson

Útrás í nýtingu jarðvarma – Lárus Elíasson (Enex)

Hreinsun útblásturs frá jarðvarmavirkjunum – Teitur Gunnarsson (VGK-Hönnun)

Jarðhitaboranir og jarðefnafræði – Þráinn Friðriksson (ISOR)

12:00 Hádegismatur á Hótel Loftleiðum

13:00 Lota 2: Stóriðja, umsjón: Soffía Sveinsdóttir

Álframleiðsla-rafgreining – Gunnar Ari Guðmundsson/Fannar Jónsson (Alcan)

Járnblendifélagið fetar inná nýjar brautir – Þorsteinn Hannesson (Íslenska Járnblendifélagið)

Kísilframleiðsla, raunhæfur kostur á Íslandi – Guðmundur Gunnarsson (Íslenska nýsköpunarmiðstöðin)

15:00 Kaffihlé og veggspjaldakynningar

16:00 Lota 3: Umhverfismál og nýjungar, umsjón: Guðbjörg H. Óskarsdóttir

Efnavöktun í umhverfi iðjuvera – Þór Tómasson (Umhverfisstofnun)

Aflþynnur, hvað er það? – Magnús Þór Ásgeirsson (Atvinnuþróunarfélag Eyjafjarðar)

Koldíoxíð sem eldsneyti – Oddur Ingólfsson Carbon Reciclyng International (CRI)

Spörun jarðefnaeldsneytis, raunhæfar lausnir – Sigþór Pétursson (Háskólinn á Akureyri)

18:30 Fordrykkur og veggspjaldakynningar framhald

19:30 Kvöldverður, þriggja rétta máltíð, veislustjóri: Oddur Ingólfsson

———————-

Ráðstefnugjald: 12.000 kr.

Efnís félagar: 9.800 kr.

BS nemar: 5.000 kr (ef félagar í Efnís).

Vinsamlegast tilkynnið þátttöku til Svönu H. Stefánsdóttir, svana(hjá)hi.is, fyrir 10. nóvember.

Ráðstefnugjald skal leggja inn á reikning Efnafræðifélagsins, ef greitt er fyrir aðra skal setja inn nafn eða kennitölu í tilvísun: Reikningur: 0137-26-2420 og kennitala: 590100-2420

Veggspjaldakynning: Tilkynnið þátttöku á sama netfang, svana (hjá) hi.is, fyrir 1. nóvember.

Fjórða ráðstefna Efnís nálgast!!!

Efnís — Thu, 01 Jan 1970 00:00:00 +0000

Efnís hefur staðið fyrir þremur ráðstefnum; í Reykholti 2000, á Akureyri 2002 og á Nesjavöllum 2004. Samkvæmt hefðinni hefði átt að vera ráðstefna 2006 en stjórn Efnís ákvað að fresta ráðstefnunni um eitt ár. Ástæðan er sú að Raunvísindaþing hefur verið haldið á vegum HÍ síðustu ár (2004 og 2006) og þingið hefur svalað ráðstefnuþörf háskólasamfélagsins að einhverju marki. Stjórn Efnís fannst eðlilegast að halda ráðstefnur Efnís þau ár sem Raunvísindaþing er ekki haldið.

En nú er komið að fjórðu ráðstefnunni og hún verður haldin í Reykjavík að þessu sinni, þann 17. nóvember.

Fyrirkomulag verður hefðbundið, fyrirlestrar (þrjár lotur) og veggspjaldakynningar en ráðstefnan stendur bara yfir í einn dag og lýkur með kvöldverði, glensi og gaman.

Ráðstefnunefndina 2007 skipa: Guðbjörg Hrönn Óskarsdóttir og Soffía Sveinsdóttir (fulltrúar stjórnar Efnís), Svana H. Stefánsdóttir, Sigríður Jónsdóttir, Halldór Svavarsson og Már Másson.

Undirbúningsvinna er í fullum gangi en hér að neðan eru útlínur ráðstefnunnar:

Staðsetning: Hótel Loftleiðir

Dagsetning: Laugardagurinn 17. nóvember

Þema: Efnafræði og orkuiðnaður (veggspjöld undanskilin þemanu)

Drög að dagskrá:

9:30 Mæting, ráðstefnugögn afhent

10:00 Fyrirlestrar og umræður, lota 1

12:00 Hádegismatur á hótelinu

13:00 Fyrirlestrar og umræður, lota 2

15:00 Kaffihlé og veggspjaldakynningar

16:00 Fyrirlestrar og umræður, lota 3

18:00 Fordrykkur og veggspjaldakynningar framhald

19:00 Borðhald, þriggja rétta máltíð

Ef þið hafið ábendingar varðandi efnistök, hugmyndir að fyrirlestrum eða hafið áhuga á að kynna veggspjöld, ekki hika við að hafa samband við einhvern af meðlimum nefndarinnar. Svana H. Stefánsdóttir mun taka við skráningum á ráðstefnuna, netfang hennar er svana hjá hi.is.