Efnafr

Ný stjórn

Beno — Wed, 03 Mar 2010 22:50:04 +0000

Aðalfundur Efnís var haldinn á Sólon 18. Febrúar síðastliðinn, mæting var ágæt.
Ný stjórn Efnís var kjörin en urðu á miklar mannabreytingar, nýja stjórn skipa:

Margrét Þorsteinsdótir	Formaður
Guðjón Andri Gylfason	Varaformaður
Benedikt Ómarsson	Ritari
Ómar Freyr Sigurbjörnsson	Gjaldkeri
Hörður Filipusson	Meðstjórnandi
Hrönn Ólína Jörundsdóttir	Varamaður

Ný stjórn þakkar þeirri fráfarandi vel unnin störf á síðasta starfsári og árum. Við viljum sérstaklega þakka þeim er hve lengst hafa setið í stjórn Efnís.

Að auki hefbundinna aðalfundarstarfa var rædd tillaga Odds Ingólfssonar um útgáfu á efnafræðingatali. Mikill áhugi er innan félagsins að koma verkefninu í gang og koma ritinu út á ári efnafræðinnar, 2011. Nánar verður rætt um þetta síðar.

P.S. Þeir sem eiga skemmtilegar myndir frá árshátið/ráðstefnu Efnís eru beðnir um að hafa sambad við Benedikt í netfang beo4[Eyðið þessu]@[þessu]hi[og þessu].is

Hvað er að gerast í Norður Atlantshafi?

Soffia — Thu, 18 Feb 2010 23:10:20 +0000

Laugardaginn 20. febrúar kl. 13:00, flytur Jón Ólafsson, prófessor í
haffræði, erindið Sjór, súrnun og straumar.

Fyrirlesturinn verður í sal 132 í Öskju
(http://www.hi.is/node/3907) og þangað eru allir velkomnir!

Erindi Jóns er það síðasta í fyrirlestraröðinni Vísindaeyjan:
Landnám, loftslag og haf, sem haldin er í tilefni af 10 ára
afmæli Vísindavefsins.

Hægt er að hlusta á Jón segja frá erindinu hér:

http://visindavefur.hi.is/article.php?id=89

Og líka á Fasbók:

http://www.facebook.com/event.php?eid=308104702335&index=1

Aðalfundur Efnís 18. febrúar

Soffia — Mon, 25 Jan 2010 11:44:33 +0000

Aðalfundur Efnís verður haldinn fimmtudaginn 18. febrúar 2010 á kaffihúsinu Sólon, efri hæð. Hefst kl. 17:30

Dagskrá:

1. Hefðbundin aðalfundarstörf

Skýrsla stjórnar fyrir starfsárið 2009

Gjaldkeri Efnís greinir frá bókhaldi Efnís

Ólympíukeppni í efnafræði

Kosning nýrra stjórnarmeðlima

Skoðunarmenn reikninga

2. Önnur mál

Endilega fjölmennum á aðalfund.

Kaffi og kökusneið í boði félagsins.

Kveðja,
Soffía formaður Efnís

Jólakveðja

Soffia — Thu, 24 Dec 2009 09:55:41 +0000

Stjórn Efnafræðifélags Íslands óskar félagsmönnum og öðrum landsmönnum gleðilegra jóla og farsældar á komandi ári.

Hafið það sem allra best um hátíðirnar.

Með jólakveðju,

Soffía formaður Efnís

Vel heppnuð ráðstefna

Soffia — Tue, 24 Nov 2009 10:12:21 +0000

Fimmta ráðstefna Efnís var haldin 14. nóvember á Hótel Loftleiðum. Ráðstefnan var afar vel sótt og góður rómur var gerður að fyrirlestrum og veggspjöldum. Tæplega sjötíu manns sóttu ráðstefnuna og rúmlega sextíu snæddu hátíðarkvöldverð sem einnig var árshátíð félagsins.

Fjallað var um ráðstefnuna á vefnum student.is. Hér er tengill á fréttina.

Veitt voru verðlaun fyrir besta veggspjaldið og að féllu þau í skaut Manuelu Magnúsdóttur meistaranema í lífefnafræði við HÍ.

Um kvöldið var ýmislegt gert til skemmtunar. Ingvar Árnason flutti skemmtilegt erindi og Sigurður Smárason sýndi efnafræðitöfrabrögð með sprengjugenginu sínu.

Ráðstefnunefndin og stjórn Efnís þakka þátttakendum kærlega fyrir einkar ánægjulegan dag!

5. ráðstefna Efnís – framlengdur skráningarfrestur

Soffia — Mon, 02 Nov 2009 16:57:48 +0000

5. ráðstefna Efnís verður haldin 14. nóvember á Hótel Loftleiðum.

Við getum enn tekið við skráningum og ágripum. Fresturinn fyrir ágripin hefur verið framlengdur til 6. nóvember en hægt er að skrá sig á ráðstefnuna/árshátíðina fram í næstu viku.

Tilkynnið þátttöku á efnis09@gmail.com.

Breyting hefur orðið á dagskránni, Tom Brenner afboðaði sig vegna Japansferðar en í staðinn mun Eric hjá kerfislíffræði HÍ halda tölu, titill erindisins er ekki kominn á hreint.

Eins er vert að benda á að hádegisverður er innifalinn í ráðstefnugjaldinu.

Kvöldverðurinn eftir ráðstefnuna er líka árshátíð Efnís. Hægt er að mæta eingöngu á árshátíðina og makar eru að sjálfsögðu velkomnir!

Siggi Smára verður að vanda með efnafræðitrikk (vonandi fer brunakerfið ekki í gang eins og í Iðnó fyrir tveimur árum) og Ingvar Árnason mun rifja upp tilurð Efnís fyrir tíu árum. Við rifjum upp ráðstefnulagið frá síðustu ráðstefnu – og kannski er spurning um nýjan ráðstefnutexta?!

Matseðill kvöldsins:

Forréttur: Rjómalöguð blómkálssúpa með brauðkruðum.

Aðalréttur: Steikarhlaðborð; lambalæri, nautafilé og kalkúnabringa ásamt tveimur tegundum af sósum, salötum, grænmeti, kartöflum og öðru tilheyrandi.

Eftirréttur: Volg súkkulaðikaka með jarðarberjum og vanilluís

Upprunalega auglýsingin er hér.

Sjáumst sem flest á þessari áhugaverðu ráðstefnu! Eflum félagsandann, styrkjum efnafræðiræturnar og fræðumst um nýjustu rannsóknirnar.

Nóbelsverðlaun í efnafræði 2009

Soffia — Wed, 07 Oct 2009 15:32:22 +0000

Að þessu sinni hlutu þrír vísindamenn nóbelsverðlaun fyrir rannsóknir sínar á byggingu og virkni ríbósóma.

Sjá nánar á heimasíðu nóbelsverðlaunanna.

Ráðstefna Efnís í nóvember – efnafræði og nýsköpun

Soffia — Mon, 05 Oct 2009 15:35:55 +0000

5. ráðstefna Efnafræðifélags Íslands verður haldin 14. nóvember á Hótel Loftleiðum. Efna- og lífefnafræðingar eru hvattir til þess að nýta þetta tækifæri til að kynna rannsóknir sínar og nemenda sinna með veggspjöldum. Þema ráðstefnunar verður Efnafræði og nýsköpun.

Skráningarfrestur á ráðstefnuna er til 1. nóvember á netfangið efnis09@gmail.com. Ágrip erinda og veggspjalda skal senda á sama netfang.

Ráðstefnunni verður skipt upp í þrjár lotur, Líf- og Heilsutækni; Efnafræði og efnatækni; og Græn efnafræði (sjá dagskrá hér að neðan).

Ágrip skulu vera á bæði íslensku og ensku og rúmast á einni A4 síðu.

Standarnir sem halda munu upp veggspjöldunum setja ákveðnar skorður. Best er ef spjöldin verði í stærsta lagi í A0 og auðvitað standandi (hæðin mesta lagi 120 cm og breiddin í mesta lagi 90 cm).

Að lokinni ráðstefnunni, verður haldinn árshátíð Efnafræðifélags Íslands 2009 sem var frestað vegna óvissunar í þjóðfélaginu síðasta vetur.

Verð:

	Meðlimur Efnís	Ekki meðlimur	BS nemar*
Ráðstefna + kvöldverður	10.800	14.900	8.000
Ráðstefna án kvöldverðar	6.400	8.000	2.500
Kvöldverður eingöngu	4.900	6.300	4.900

* Gegn því að BS nemar gerist aukaaðilar að félaginu.

Dagskrá:

10:10 – 12:00 Líf- og heilsutækni.

Sesselja Sigurborg Ómarsdóttir, Háskóli Íslands: Bioprospecting: Efnaauðlegð í lífríki hafsins.

Gissur Örlygsson, NMI – Tækni: Kítínafleiður og kalsíumfosföt til beingræðslu.

Tom Brenner, Iceproteins: Einangrun, notkun og eiginleikar þorskvöðva próteina.

Örfyrirlestrar úr völdum ágripum veggspjalda 1 & 2.

13:00 – 15:00 Efnafræði og efnatækni.

Sunna Ólafsdóttir Wallevik, Steyputækni: Nýsköpun í steyputækni á Íslandi.
Páll Theodórsson, Háskóli Íslands: Upphaf landnáms lesið með kolefnis-14 aldursgreiningum.

Ragnar Jóhannsson, Arctic Tilapia: Efnafræði vatnsendurnýtingar í eldi hlývatnsfiska á Íslandi.

Örfyrirlestrar úr völdum ágripum veggspjalda 3-5.

15:00 – 16:00 Kaffihlé og veggspjaldakynningar.

16:00 Græn efnafræði.

Oddur Ingólfsson, Bíódísel hf: Bíódísel á Íslandi.

Sigurbjörn Einarsson, Bláa lónið: Fóðrun smáþörunga með CO₂ jarðhitagasi.

Edda Sif Aradóttir, Háskóli Íslands: Föngun og förgun kolefnis – staðbundnar lausnir á hnattrænum vanda.

17:00 – 19:00 Hlé.

19:00 – 01:00 Árshátíð Efnafræðifélags Íslands. Veislustjóri, Soffía Sveinsdóttir.

Hér má nálgast auglýsinguna.

Fimmta ráðstefna Efnís 14. nóvember

Soffia — Mon, 21 Sep 2009 13:24:24 +0000

Fimmta ráðstefna Efnís verður haldin þann 14. nóvember á Hótel Loftleiðum. Þema ráðstefnunnar er “efnafræði og nýsköpun”. Fyrirlestrum er skipt niður á þrjár lotur sem allar tengjast nýsköpun: a) lífefnafræði, b) efnafræði, c) græn efnafræði.

Einnig gefst háskólanemendum, prófessorum og fyrirtækjum að kynna rannsóknir sínar, vörur, nýjungar eða annað tengt efnafræði með veggspjöldum. Veggspjöldin mega fjalla um hvað sem er sem tengist efnafræði. Lokaskiladagur ágripa á ensku og íslensku er 1. nóvember. Ágrip skal senda á efnis09@gmail.com. Fimm aðstandendum veggspjalda verður boðið að halda örfyrirlestra til að kynna veggspjöldin.

Vel heppnuð ráðstefna um sameindakennsl

Soffia — Wed, 16 Sep 2009 13:37:08 +0000

Ráðstefnan „Affinity 2009″ sem Alþjóðafélag um sameindakennsl (e. International Society for Molecular Recognition, ISMR) stendur fyrir annað hvert ár, var haldin dagana 12. til 16. júlí á Háskólatorgi.

Þar var Dr. Ruedi Aebersold, prófessor í Zürich, veitt Pierce Affinity Award sem kostuð eru af fyrirtækinu Pierce sem nú er hluti Thermo Scientific samsteypunnar. Var Dr. Aebersold sérstaklega boðið til Íslands til að taka við verðlaununum. Var hann valinn af sérstakri valnefnd undir forsæti Meir Wilchek prófessors við Weizmann Institute of Science í Ísrael, eins af upphafsmönnum griptækninnar (affinity chromatography) og avidin-biotin kerfisins sem víða er notað í líftækni. Dr. Aebersold hélt síðar fyrirlestur á ráðstefnunni og var titillinn: “Systems Biology: Network of Interacting Molecules”.

Í lok ráðstefnunnar voru veitt verðlaun, Roche Younger Investigator Awards, til ungra vísindamanna sem kynntu rannsóknir sínar með fyrirlestrum eða veggspjöldum. Verðlaunin eru kostuð af fyrirtækinu Hoffmann-La Roche Ltd. Fyrstu verðlaun fyrir veggspjöld hlutu sameiginlega, þeir Haraldur Garðarsson og Sandip Shelke, báðir nemendur Snorra Þórs Sigurðssonar prófessors í lífrænni efnafræði við raunvísindadeild Háskóla Íslands. Titill verkefnis Sandips var “Nucleic acid receptor-ligand interactions studied by EPR spectroscopy”. Titill verkefnis Haraldar var “Single nucleotide mismatch detection using fluoroside çf”. Meðal annarra sem hlutu viðurkenningu var Óttar Rolfsson doktorsnemi við Háskólann í Leeds á Englandi. Titill erindis hans var: “The MS2 genome is a dynamic scaffold for MS2 capsid assembly”.

Dagskrá ráðstefnunnar, útdrætti erinda og veggspjalda ásamt ljósmyndum má sjá á vefsíðu ráðstefnunnar http://www.affinity2009.hi.is/

Hér eru tvær myndir frá verðlaunaafhendingum:

Ruedi Aebersold , handhafi Pierce Award for Affinity; Hörður Filippusson, forseti ráðstefnunnar; Meir Wilchek; Gideon Fleminger, forseti ISMR

Roche Younger Investigator Award verðlaunahafar ásamt matsnefndinni.